Dagur B. Eggertsson, þingmaður Samfylkingarinnar og fyrrum borgarstjóri, er með innlegg í umræðuna um breytingar í miðborginni.
Segir Dagur að umræða um breytingar í bæjarhlutanum bresti á reglulega sem sé flott.
„Mín upplifun er sú að miðborgin hafi gengið í endurnýjun lífdaga, frá endurnýjun Hlemms i austri, til endurgerðar Hverfisgötu í norðri og byggingu Hörpu, Hafnartorgs og Austurhafnar, endurnýjun Kvosar og endurnýjun Vesturbugtar og Granda til vesturs. Illa farin hús hafa verið gerð upp í stórum stíl, byggt í skörðin og svæðin milli húsanna hafa mörg verið fegruð. Blómin og gróðurinn um allt er svo kapituli út af fyrir sig. Mannlífið og menningin hefur aldrei verið meiri.“
Í færslu sinni á Facebook segir Dagur einstaklinga, fyrirtæki og borgina hafa lagst á eitt við breytingar og það megi þakka. Með færslunni birtir hann Dagur fjölda mynda sem sýna breytingar á húsum í miðbænum sem komu út í bæklingi á sínum tíma.
„Ég á ótrúlega mikið af „fyrir og eftir“ myndum af mörgu af þessu og kannski er góð vísa aldrei of oft kveðin, en alla vega líklega í lagi að rifja upp nokkrar, sem komu út í sérstökum bæklingi hér um árið. Flettið í gegn. Ekki allt að allra smekk en nær allt til mikilla bóta. Er svo klár með fullt af nýjum dæmum ef stemmning er fyrir því.“
Rétt er að geta þess að Vesturbugt og Grandi tilheyra Vesturbæ Reykjavíkur.
„Borgin er miklu flottari, eina sem ég sakna er að það er ekki lengur hægt að keyra niður Laugaveginn“, segir Guðfinna Jóh. Guðmundsdóttir lögmaður.
„Dagur hefur lyft grettistaki í uppbyggingu miðbæjarins.“ sagði vinur minn, búsettur erlendis lengi, þegar ég bauð honum í bíltúr um bæinn. Glöggt er gests augað“, segir Eiríkur Jónsson fjölmiðlamaður.
„Miðbærinn hefur aldrei verið lífvænlegr,.“ segir Sigmundur Ernir Rúnarsson þingmaður sem lengi hefur verið búsettur í miðbænum. Í sama streng tekur Viðar Eggertsson fyrrum leikstjóri og leikari sem einnig er miðbæjarbúi til margra ára: „Ég þekki vel miðborgina og hef unun af að ganga um hana og sækja þar bæði verslun og þjónustu. Miðborgin er stöðugt að verða fallegri.“
Ekki eru þó allir ánægðir með breytingar á miðbænum:
„Himinhátt leiguverð er að drepa miðbæinn, veitingarekstur skiptir um eigendur mjög hratt og veitingastaðir rétt ná að vera réttu megin við núllið. Verslun á erfitt með að þrífast og fjárfestingafélög virðast vera allsráðandi á fasteignamarkaði miðbæjarins. Persónulega þekki ég ekki þennan miðbæ og á sjaldan erindi þangað,“ segir kona nokkur.
Önnur saknar útsýnis við Skúlagötu: „Mjög ánægð með flestar breytingarnar þarna. Takk. Helst sem mér finnst leiðinleg hásýsin niðrí við sjó á Skúlagötunni sem tóku útsýni margra og auk þess eru sum þeirra frekar ljót.“
„Blackpearl hótel,Skuggi hótel,Reykjavík hótel,Skuggahverfið,Hafnartorgsreiturinn með Edition hótel og Landsbankanum,Hlíðarfótur,Vesturvin að ógleymdum Breytingum við Vélskólan og hryllingshúsið sem þar er búið að planta. Fallegt aðgengi að kirkju Óháða Safnarins eyðilegst með svona óskapnaði sem nágranna. Þetta er nú bara slatti. Heyrði því svo fleygt fram að eina leiðin til að losna við Samfó úr meirihlutanum væri að kjósa Sjálfstæðisflokkinn sem er synd fyrir flokkana með alvöru hugsjónir,“ segir karlmaður. (Það skal athugast að Vélskólinn tilheyrir Holti og Hlíðum ekki miðborginni).
Mun fleiri myndir má sjá í færslu Dags.
