Ásalaug Arna Sigurbjörnsdóttir sagði eins og kunnugt er af sér þingmennsku í gær. Í kjölfarið birti Heimildin umfjöllun um launamál hennar en hefur hlotið nokkra gagnrýni fyrir það. Hefur gagnrýnin ekki aðeins komið frá samherjum Áslaugar Örnu og vinum heldur einnig pólitískum andstæðingum en meðal annars er því haldið fram að umfjöllunin snúist að einhverju leyti um af hvaða kyni Áslaug Arna er. Meðal gagnrýnenda er blaðamaður Morgunblaðsins sem gagnrýnir að Heimildin fjalli um laun Áslaugar Örnu en ekki laun fyrrum ritstjóra miðilsins en ekki hefur mikið farið fyrir umfjöllun fyrrnefnda miðilisins um Áslaugu Örnu. Þó ber einnig á gagnrýni í garð Áslaugar Örnu í tilefni af umfjöllun Heimildarinnar.
Eftir að Áslaug Arna tilkynnti um afsögn sína birti Heimildin frétt um að hún hefði fengið 3,1 milljón króna í þingfararkaup á meðan níu mánaða námsleyfi hennar í Bandaríkjunum stóð. Síðar um daginn birti miðilinn aðra frétt þar sem fram kom að Áslaug Arna ætti eftir afsögnina rétt á biðlaunum í sex mánuði og minnt á að þingfararkaup í hálft ár nemi 9,7 milljónum króna. Fram kom einnig að sú upphæð færi langleiðina með að duga fyrir skólagjöldum sem Áslaug Arna þyrfti að greiða fyrir nám sitt við Columbia-háskóla í New York. Áréttað er í fréttinni að taki Áslaug Arna við öðru starfi áður en þessir sex mánuðir eru liðnir skerðist biðlaunin.
Hvern á að fjalla um
Meðal þeirra sem gagnrýna umfjöllun Heimildarinnar um laun Áslaugar Örnu er Andrea Sigurðardóttir blaðamaður á Morgunblaðinu en Andrea er einnig virk í starfi Sjálfstæðisflokksins og vinkona Áslaugar Örnu.
Andrea rifjar upp á Facebook eldri færslu sína þar sem hún gagnrýndi Heimildina fyrir að fjalla ekki um það að Þórður Snær Júlíusson fyrrum ritstjóri miðilisins þáði þingfararkaup frá því að hann var kjörinn á þing í kosningunum 2024 og þar til þing kom saman í febrúar 2025 en þá sagði hann af sér þingmennsku. Þórður Snær greip til þess ráðs eftir að Morgunblaðið upplýsti um að hann hefði á fyrsta áratug þessarar aldar haft uppi mjög gróf ummæli á netinu:
„Af umræðunni að dæma er full ástæða til að rifja þessi skrif mín upp frá því á síðasta ári. Við þetta má bæta að ef ÁAS ætlaði sér að hlunnfara þjóðina, þá hefði hún auðvitað setið þessa einu viku sem eftir er af þinginu fyrir sumarfrí og sagt af sér eftir sumarfrí. Það gerði hún ekki. Næsta mál.“
Morgunblaðið fjallaði um að Þórður Snær hefði þegið þingfararkaup frá því hann var kjörinn á þing í lok nóvember 2024 og þar til hann sagði af sér þegar þing kom saman í febrúar og að hann ætti rétt á biðlaunum eftir afsögnina en síðan ákveðið að þiggja þau ekki. Eftir afsögnina tók Þórður Snær við starfi framkvæmdastjóra þingflokks Samfylkingarinnar.
Ekki hefur hins vegar farið mikið fyrir umfjöllun Morgunblaðsins um laun Áslaugar á meðan námsleyfinu stóð og biðlaunarétt hennar en það er kannski ekki undarlegt í ljósi þess að faðir hennar er stjórnarformaður útgáfufélags blaðsins.
Deila
Áslaug Arna er bersýnilega ánægð með þessa færslu Andreu en þingmaðurinn fyrrverandi deilir færslunni. Meðal þeirra sem taka undir gagnrýni á umfjöllun Heimildarinnar, í athugasemdum við færslu Áslaugar Örnu er Ívar Guðmundsson útvarpsmaður á Bylgjunni:
„Alveg furðulegt að að fara alltaf þessa leið þegar fólk er bara að fara eftir lögum og reglum sem gilda.“
Björn Þorláksson fjölmiðlamaður á Samstöðinni er hins vegar ekki mikil aðdáandi Áslaugar Örnu og deilir frétt Heimildarinnar um biðlaunarétt hennar með eftirfarandi orðum:
„Nytsamir sakleysingjar hafa í dag verið iðnir á Internetinu að mæra þennan mikla höfðingja í pólitískri stétt, manneskju sem nú hefur sýnt almenningi afturendann – enn eina ferðina. Framandi að sjá allt þetta fólk úr öllum flokkum tárfella og mæra þá manneskju ákafast sem vann skemmdarverk á félagslegum kerfum og hefur alltaf haft atvinnu af því að sjúga spena ríkisins – í þetta skipti til blóðs.“
Athygli vekur hins vegar að meðal þeirra sem koma Áslaugu Örnu til varnar vegna umfjöllunar Heimildarinnar er pólitískur andstæðingur hennar, Jódís Skúladóttir fyrrum þingkona Vinstri grænna:
„OMG! Hvernig finn ég mig í þeim fáránlegu aðstæðum að langa til að verja íhaldið? Táknmynd spillingar og sjálftöku! Ég er ekki alveg viss en ég held að það sé femínistinn í mér sem fer á rönguna við að lesa andstyggð kommentakerfanna. Við elskum að velta okkur upp úr þessu en höfum samt staðreyndirnar á hreinu. Áslaug Arna var ekki á launum á meðan varamaður hennar sat á þingi og hún sat á skólabekk. Hins vegar við þingslit víkja varamenn af þingi og aðalmenn taka formlega sæti á ný og þar með fór ÁA á launaskrá eins og hinir þingmennirnir sem voru í sumarfríi heima hjá sér eða á Tene. ÁA hefur engar 10 millur fengið í biðlaun og ekkert komið fram um hvort hún hyggist þiggja þær. Ég geri frekar ráð fyrir því að hennar bíði eitthvað miklu betur launað djobb (eins og íhaldsins er von og vísa) svo væntanlega falla biðlaunin niður frá þeim degi sem hún hefur störf à nýjum vettvangi. En Áslaug er kona og það er íslensk umræðuhefð að hjóla af hörku og hatri gegn konum í pólitík.“
Bendir Jódís í því samhengi á að lítið hafi farið fyrir umfjölllun um að Vilhjálmur Árnason bæjarstjóri Reykjanesbæjar sé líka þingmaður og þiggi því laun frá bæði bænum og ríkinu. Vilhjálmur hefur sagt að hann muni segja af sér þingmennsku eftir um viku til 10 daga.
